Путин ќе го врати „Генералот Армагедон“ на фронтот? Се појавија нови шпекулации

По повеќе од четири и пол години војна во Украина, повторно се појавија наводи дека рускиот генерал Сергеј Суровикин би можел да добие нова улога во руските воени операции.

— реклама —

Суровикин, познат под прекарот „Генерал Армагедон“, неодамна се вратил во Москва, што поттикна шпекулации за негово можно враќање на фронтот. Неговото враќање го коментирал рускиот воен аналитичар и поранешен полковник Виктор Баранец, а неговите изјави ги пренесува „The Sun“.

„Генерали како него не седат без работа на кауч. На Русија и на нејзината армија им се потребни такви генерали. Кремљ и Министерството за одбрана сериозно размислуваат како да го вклопат Суровикин – цврст, одлучен и моќен воен командант – во реалноста што моментално се создава на бојното поле“, изјавил Баранец.

— реклама —

Суровикин ја предводеше руската воена кампања во Украина од октомври 2022 до јануари 2023 година, кога беше сменет од функцијата од страна на рускиот претседател Владимир Путин.

— реклама —

Според „The Sun“, неговото отстранување било поврзано со сомневања дека бил вмешан во планирањето на бунтот предводен од лидерот на групата „Вагнер“, Евгениј Пригожин. По тоа, Суровикин бил префрлен на должност поврзана со надгледување на руските воени операции во Африка.

Сега се појавија шпекулации дека би можел повторно да добие значајна командна улога, меѓу другото, во можни операции кон Славјанск и Краматорск или во евентуална нова офанзива кон Киев.

Засега нема потврда дека Суровикин ќе биде вратен на фронтот, ниту дека ќе биде поставен на некоја од наведените командни позиции.