Радев повторно ќе ја отвори темата за Бугарите во Македонија пред Советот на Европа

Бугарскиот премиер Румен Радев најави дека пред генералниот секретар на Советот на Европа, Ален Берсе, повторно ќе го покрене прашањето за положбата на бугарската заедница во Македонија. Тој тврди дека нема подобрување во односот на македонските власти кон Бугарите, туку дека проблемите дополнително се продлабочуваат.

— реклама —

Радев ова го изјави во Даблин, за време на деветтиот самит на Европската политичка заедница, каде што се собраа европски лидери и претставници на меѓународни институции. На маргините на самитот е предвидена и негова средба со генералниот секретар на Советот на Европа.

— реклама —

Бугарскиот премиер рече дека средбата е важна за зајакнување на улогата на Советот на Европа како гарант на демократијата, човековите права и владеењето на правото. Притоа најави дека повторно ќе укаже на, како што оцени, недоволните чекори на македонските власти за подобрување на положбата на бугарската заедница.

— реклама —

Ова не е првпат Бугарија да го отвора прашањето пред Советот на Европа. Во септември во Стразбур, претседателката Илијана Јотова разговарала со Берсе и посочила дека Софија ги спровела досегашните препораки, изразувајќи надеж дека надзорот врз групата предмети „ОМО Илинден и други против Бугарија“ наскоро ќе заврши. Таа тогаш оценила дека отворените предмети му штетат на угледот на Бугарија.

— реклама —

Надзорот на Комитетот на министри на Советот на Европа се однесува на спроведувањето на пресудите на Европскиот суд за човекови права поврзани со слободата на здружување. Во доставениот текст се наведува дека ниту една од 14-те пресуди со кои на Бугарија ѝ е наложено да ги регистрира македонските здруженија не е спроведена.