Бугарскиот претседател Румен Радев упати нови критики кон македонското раководство, оценувајќи дека властите во Скопје прават сè што е можно за да го одложат пристапувањето на земјата во Европската Унија. Тој воедно порача дека не гледа потреба од нова средба со премиерот Христијан Мицкоски.
Изјавата на Радев доаѓа по усвојувањето на најновиот извештај за напредокот на Македонија во Европскиот парламент, во кој повторно се нагласуваат обврските што земјата треба да ги исполни во рамките на европскиот процес.
Во документот останува нотирана важноста на Вториот протокол од Договорот за добрососедство со Бугарија, како и потребата Заедничката историска комисија да постигне конкретни и мерливи резултати. Дополнително, се потенцира дека уставните измени остануваат главен предуслов за отворање на првиот кластер во пристапните преговори со ЕУ.
Осврнувајќи се на можноста за средба со Мицкоски, Радев изјави дека „нема што повеќе да си кажат“, нагласувајќи дека консензусот постигнат во јули 2022 година мора целосно да се почитува.
„Повторно треба да вложиме максимални напори да ги убедиме европските лидери дека договореното во 2022 година мора да се спроведе“, изјави Радев, додавајќи дека Бугарија ќе продолжи да инсистира на почитување на преземените обврски.
Повод за неговата реакција беше и неодамнешниот инцидент пред бугарската амбасада во Скопје, кога беа запалени две дипломатски возила, случај што беше осуден и од македонските и од бугарските власти.
Со ова, Софија повторно испрати порака дека вклучувањето на Бугарите во Уставот, спроведувањето на билатералните договори и напредокот на историската комисија остануваат клучни услови за натамошен напредок на Македонија на патот кон членство во Европската Унија.
