Во период кога македонските евроинтеграции повторно се соочуваат со политички блокади и остри внатрешни поделби, Румен Радев од Париз порача дека лично вложил значителни дипломатски напори за прашањето за внесување на Бугарите во македонскиот Устав да стане дел од европската преговарачка рамка.
Пред средбата со Емануел Макрон во Париз, Радев изјави дека уште во 2021 година го отворил прашањето за уставните измени во Македонија.
„Ми требаше една година да ги убедам европските лидери зошто тоа треба да се случи. Му оддавам признание на претседателот Макрон, кој прв ја согледа оправданоста на оваа идеја, и со заеднички напори таа беше вклучена во преговарачката рамка во јули 2022 година“, изјавил Радев, пренесуваат бугарските медиуми.
Тој додал дека очекува поддршка од Франција за целосно спроведување на договорениот европски консензус поврзан со македонските евроинтеграции.
За време на посетата на Франција, Радев разговара со Макрон за билатералната соработка, европската агенда, војната во Украина и енергетската политика. Бугарскиот претседател порача дека Европа треба да има поактивна улога во мировните разговори со Русија и повторно да ја врати дипломатијата во фокусот.
Тој истакна и дека Бугарија ќе инсистира нуклеарната енергија да биде признаена како зелена и стратешки важна за Европа, при што ја нагласи соработката меѓу Софија и Париз во областа на нуклеарната енергетика и железничката инфраструктура.
По посетата на Франција, Радев заминува за Брисел, каде што ќе има средби со белгискиот премиер Барт де Вевер, со генералниот секретар на НАТО Марк Руте, како и со претседателката на Европската комисија, Урсула фон дер Лајен, и претседателот на Европскиот совет, Антонио Кошта.
