Патникот кој за малку ќе беше извлечен од авион на „Рајанер“ по пукањето на прозорецот за време на летот најави тужба против ирската авиокомпанија, тврдејќи дека како компензација му бил понуден само нов авионски билет.
Според „Телеграф“, станува збор за 61-годишниот Љубиша Каровиќ од Србија, кој ангажирал адвокат и бара отштета од компанијата по инцидентот што се случил пред две недели на лет од Солун до Меминген.
Каровиќ изјавил дека спиел кога прозорецот покрај неговото седиште пукнал на височина од околу 6.000 метри, а разликата во притисокот делумно го извлекла надвор од авионот. Неговиот живот, како што тврди, го спасиле сопругата Светлана и други патници кои го држеле за нозете.
Тој наведува дека по несреќата никој од „Рајанер“ лично не го контактирал, туку семејството добило само електронски пораки со понуда за нов лет.
Во инцидентот Каровиќ се здобил со изгореници и повреди на раката и градниот кош, а вели дека и денес има психички последици и не може да спие.
По наглото губење на притисокот во кабината, пилотот го спуштил авионот на помала височина, патниците ставиле кислородни маски, а леталото се вратило во Солун, каде што Каровиќ бил пренесен во болница.
Неговиот адвокат најави дека ќе бара значителна отштета, оценувајќи дека не станува збор само за финансиска компензација, туку и за утврдување на одговорноста за инцидентот.
Од „Рајанер“ соопштија дека нема да ја коментираат несреќата додека трае истрагата, но истакнаа дека нивниот тим за поддршка е во контакт со семејството и дека екипажот постапил професионално, успешно враќајќи го авионот во Солун.
Инцидентот го истражува американскиот Национален одбор за безбедност во сообраќајот (NTSB), кој треба да го објави прелиминарниот извештај во наредните недели.
