Високите цени на нафтата би можеле да донесат поскапи авионски билети во Европа, а дел од авиокомпаниите би можеле да се соочат со сериозни финансиски проблеми доколку цените на горивото останат високи до летото 2027 година. На ова предупреди ирската нискобуџетна авиокомпанија „Рајанер“.
Од компанијата посочуваат дека керозинот моментално се продава за околу 140 долари за барел, додека цената на суровата нафта „Брент“ во еден момент достигна 97,04 долари за барел. Причина за растот се новите судири меѓу САД и Иран и стравувањата од нарушување на снабдувањето.
„Рајанер“ предупредува дека авиокомпаниите што немаат доволно заштита од растот на цените на горивото би можеле да бидат принудени да го намалат бројот на летови, а некои од нив можеби нема да ја издржат претстојната зимска сезона.
Ирската компанија е во поповолна позиција бидејќи однапред обезбедила 80 отсто од потребното авионско гориво по цена од 67 долари за барел. Поради тоа, очекува уште една профитабилна година, иако добивката по оданочување би требало да биде пониска од рекордната, остварена минатата година.
„Рајанер“ очекува летната сезона да ја заврши со околу 145 милиони патници, што е повеќе од пет отсто над минатогодишните 138 милиони.
Сепак, компанијата ја намали прогнозата за вкупниот број патници во финансиската година што завршува во март 2027 година, од 216 на 214 милиони. Целта е да се намали изложеноста на високите цени на горивото во текот на зимските месеци, кога работењето на авиокомпаниите традиционално е послабо.
Според проценките на „Рајанер“, намалувањето на зимскиот ред на летање би можело да ги намали зимските загуби за 70 до 100 милиони евра.
