„Рајанер“: Туѓ предмет најверојатно го оштетил моторот на авионот при полетувањето

Прелиминарната истрага за инцидентот на летот на „Рајанер“, во кој патник речиси бил извлечен низ скршен прозорец, укажува дека моторот најверојатно бил оштетен од туѓ предмет за време на полетувањето, изјави извршниот директор на авиокомпанијата, Мајкл О’Лири.

— реклама —

Тој, презентирајќи ги кварталните резултати на компанијата, рече дека првичните наоди упатуваат на таканаречено „оштетување од туѓ предмет“ (FOD), што значи дека моторот бил погоден од предмет кој не е дел од авионот.

„Првичните наоди укажуваат на оштетување на моторот предизвикано од туѓ предмет за време на полетувањето во Солун, но тоа засега не можеме со сигурност да го потврдиме“, изјави О’Лири, пренесе „Ројтерс“.

— реклама —

Според него, нема индикации дека причината за инцидентот била староста на авионот или пропусти во неговото одржување. Авионот бил стар 18 години, а моторот бил целосно сервисиран и ремонтиран во последните две години.

— реклама —

О’Лири најави дека нацрт-извештајот од истрагата ќе биде објавен за околу 28 дена, по што ќе следува и подетален извештај.

Доколку овие прелиминарни наоди се потврдат, тоа би можело да ја намали одговорноста и на „Боинг“ и на „Рајанер“, бидејќи инцидентот не би бил последица на технички дефект или несоодветно одржување на авионот.

Инцидентот се случи на 10 јули, на летот FR1879 од Солун до Меминген. Кратко по полетувањето, на авионот „Боинг 737-800“ се одвоил прозорец, по што дошло до нагла декомпресија. Српскиот државјанин Љубиша Каровиќ (61) бил делумно извлечен низ отворот, но неговата сопруга Светлана Грковиќ и неколку патници успеале да го задржат и да го вратат во кабината. По инцидентот, тој бил хоспитализиран.