„Рама мора да си оди“ – протестите во Албанија се шират, на студентите им се придружија и лекарите

Протестите против албанскиот премиер Еди Рама во Тирана продолжуваат единаесетти ден, а на студентите и универзитетските професори денеска им се придружија и лекари, здравствени работници и граѓани. Демонстрантите се собраа пред седиштето на Владата, барајќи оставка од премиерот, формирање технократска преодна влада и подобри услови за образование и живот.

Протестниот марш започна пред Политехничкиот универзитет во Тирана, од каде што студентите и професорите се упатија кон кабинетот на премиерот. Дел од студентите по медицина протестираа облечени во бели мантили и со хируршки маски, додека низ улиците се слушаа паролите „Придружете ни се“ и „Обединетите студенти ќе победат“.

— реклама —

Претседателот на синдикатот на универзитетските предавачи, Александер Ковачи, изјави дека професорите ќе продолжат да ги поддржуваат студентите и дека протестите претставуваат борба против, како што рече, диктатите на универзитетите.

„Ние сме синдикат на универзитетските предавачи и нашиот фокус се студентите. Тука сме за да ставиме крај на диктатите на универзитетите. Ќе им се придружиме на студентските протести. Каде и да се тие, ќе бидеме и ние“, порача Ковачи.

— реклама —

Поддршка за студентското движење изразија и здравствени работници, меѓу кои лекари, стоматолози и фармацевти. Лекарот и универзитетски предавач Ермал Пашај изјави дека нивното приклучување е во одбрана на животот, достоинството и иднината на Албанија.

„Не можеме да молчиме пред насилството врз младите луѓе и кршењето на нивното право на мирен протест“, рече Пашај, осудувајќи го, како што наведе, насилството врз студентите и лицата што им укажуваат прва помош на повредените.

Тој побара итна оставка од Рама, оценувајќи дека премиерот треба да преземе политичка одговорност за кризата и нејзината ескалација. Демонстрантите бараат и формирање технократска преодна влада, која, според нив, би овозможила мирно надминување на состојбата и враќање на довербата во институциите.

— реклама —

Претседателот на синдикатот на лекарите, Гентијан Строни, изјави дека студентските барања се легитимни, но истовремено повика на воздржаност и од демонстрантите и од полицијата.

„Не сакаме физичко насилство. Сакаме да ги поддржиме студентите и да се осигураме дека нема да бидат нападнати. Не сакаме повторно да ги составуваме скршените коски на Албанците, без разлика дали се студенти или полицајци“, рече Строни.

Универзитетскиот професор и поранешен пратеник Александер Биберај порача дека барањето за оставка на премиерот не е предмет на преговори и дека Рама мора безусловно да се повлече од функцијата.

Студентските протести, кои започнаа со барања за подобри образовни и животни услови, прераснаа во пошироко незадоволство од актуелната власт, а со приклучувањето на професорите, здравствените работници и граѓаните се зголемува бројот на општествени групи што јавно ги поддржуваат демонстрациите.