„Рама, поднеси оставка!“: Протестите во Албанија влегоа во 70-ти ден

Протестот против владата и премиерот на Албанија, Еди Рама, влезе во 70-тиот ден. Граѓаните, откако тргнаа во марш од плоштадот „Скендербег“, се собраа пред зградата на Владата.

Маршот се одвиваше по булеварот „Маченици на нацијата“, а долж трасата и пред зградата на Владата се слушаа извици против власта.

— реклама —

„Рама, поднеси оставка!“, „Албанија бара револуција“, „Албанија не е на продажба“ и „Крајот дојде“ беа дел од слоганите што ги извикуваа демонстрантите.

— реклама —

На протестот беа истакнати и транспаренти со пораки како „70 дена, сè уште заедно“, „70 дена за Албанија“ и „Поднеси оставка, доста беше“.

Демонстрантите побараа и ослободување на лицата кои беа уапсени по тензиите во петокот.

— реклама —

Според организаторите, протестите првично започнале како спротивставување на проектот за изградба на туристички комплекс во Звернец, но подоцна добиле директен политички карактер.

Учесниците на протестот бараат политички и институционални промени, како и смена на Еди Рама од функцијата премиер. Чести се и повиците против опозицијата и целокупната политичка класа во земјата.

Граѓаните од протестот порачаа дека се решени да продолжат со отпорот.