Албанскиот премиер Еди Рама ги отфрли обвинувањата на опозицијата и учесниците на протестите дека стои зад корупциски активности поврзани со изградбата на луксузен туристички комплекс во кој се вклучени Иванка Трамп и Џаред Кушнер.
Во интервју за „Фајненшл тајмс“, Рама порача дека не е негова обврска да ја докажува сопствената невиност.
„Луѓето велат дека јас сум водач на сето ова. Им велам – носете се. Не е мое да докажувам дека не сум кум на мафијата, туку нивно е да докажат дека сум“, изјави Рама.
Тој ги отфрли и тврдењата дека албанската економија во голема мера се темели на перење пари, нагласувајќи дека земјата денес води поодлучна борба против корупцијата отколку во минатото.
Според Рама, неговата влада им овозможила на обвинителите поагресивно да ги процесуираат случаите на корупција, што, како што оцени, создало впечаток дека корупцијата е пораспространета отколку претходно.
„Всушност, ситуацијата е спротивна. Албанија се бори како никогаш досега и денес е многу помалку корумпирана отколку што беше“, истакна тој.
Рама оцени дека дел од протестите против планираната инвестиција се поттикнати од противниците на американскиот претседател Доналд Трамп.
„Постои голем интерес овој проект да биде запрен поради Трамп. Да не беше Џаред Кушнер, никој немаше да се грижи за фламингата, за Албанија или за што било друго“, рече албанскиот премиер.
Тој изрази уверување дека проектот, чија вредност се проценува на околу четири милијарди долари, ќе продолжи и покрај протестите.
Во меѓувреме, албанското Специјално обвинителство за борба против корупцијата отвори истрага за повеќе бизнисмени осомничени за трговија со дрога и перење пари, при што под истрага се најдоа и трансакции поврзани со земјиште во близина на заштитен природен резерват, каде што е предвидена реализацијата на туристичкиот проект.
Протестите во Тирана, познати како „Револуција на фламингата“, траат со недели, а демонстрантите бараат оставка од Рама и покренување постапки за, како што наведуваат, системска корупција која овозможува градежни активности во заштитени подрачја.
