Во услови на повеќенеделни протести низ Албанија, премиерот Еди Рама упати критики кон организаторите на синоќешните демонстрации во Тирана, обвинувајќи ги дека на протестот донеле учесници од Приштина и Тетово. Рама ги нарече учесниците „жртви на политички каравани“ и нагласи дека Албанците од Македонија и Косово не можат да се сметаат за албанска дијаспора.
„Албанците од Северна Македонија не се дијаспора на Албанија на туѓа територија. Заедно со Македонците, тие се составен народ во својата земја. Дијаспората се емигранти кои живеат во странски земји, а не тие, ниту Албанците од Косово, кои имаат своја независна држава“, напиша Рама во објава на социјалните мрежи.
Веќе 22 дена Албанија се соочува со континуирани протести, наречени „Фламинго револуција“, предизвикани од контроверзниот проект за изградба на луксузен туристички комплекс поврзан со компанија на Џаред Кушнер, зет на американскиот претседател Доналд Трамп.
Покрај протестите во Албанија, демонстрации биле организирани и од албанската дијаспора во повеќе земји, меѓу кои САД, Велика Британија, Канада, Франција, Германија, Италија, Шведска и Австралија.
Демонстрантите бараат запирање на проектот, укинување на законот за стратешки инвестиции и измени во регулативите за заштитените подрачја, како и оставка од премиерот Рама.
