Рама тврди дека протестите во Тирана не се само израз на незадоволство, туку обид за дестабилизација од Русија и Иран

Албанскиот премиер Еди Рама предупреди дека насилните протести во Тирана може да ја загрозат европската перспектива на земјата и нејзината цел за членство во Европската Унија до 2030 година. Тој ги осуди нападите врз полицијата и ги обвини организаторите дека намерно поттикнуваат дестабилизација.

За време на повеќедневните протести, демонстрантите фрлале камења, метални предмети и молотови коктели кон полициските сили. Рама ги нарече маскираните лица што поттикнуваат насилство криминалци, но нагласи дека воздржаноста на безбедносните сили е неопходна за да се спречи понатамошна ескалација.

— реклама —

„Се трудев да не се мешам и трпеливо да ги следам и координирам напорите за да не паднеме во замката на насилството што бара крв“, изјави Рама.

— реклама —

Тој оцени дека насилството не ја претставува албанската младина и посочи дека дел од младите можеби се незадоволни и бараат промени, но нивните чувства ги искористуваат маскирани лица што поттикнуваат судири.

Рама протестите ги опиша како организиран обид за дестабилизација, во кој, според него, има и надворешни влијанија. Меѓу факторите што ги спомена се Русија, Иран, движењето Антифа, верски екстремисти и албански политички актери, кои ги опиша како „конгломерат кој го поттикнува и релативизира насилството“.

— реклама —

Премиерот се осврна и на студентите што тврдат дека владата не ги слушнала нивните барања. Тој рече дека повеќепати слушнал повици за негова оставка и затвор, но дека демонстрантите не ги образложиле конкретно причините поради кои бараат негово заминување.

„Сакате да си заминам, тоа е најнормалната работа на светот, но како ќе си заминам? Барем дојдете и убедете ме зошто треба да си заминам или убедете ме зошто не треба да си заминам“, изјави Рама.

Тој повика на директна и аргументирана дебата, истакнувајќи дека безбедносните сили имаат потреба од поддршка од општеството, особено кога се изложени на напади со камења, метални предмети и молотови коктели.