Здравствените власти во Демократска Република Конго соопштија дека бројот на лица заболени од ебола продолжува да расте, при што според најновите податоци во земјата во моментов се лекуваат 515 пациенти.
Според официјалните информации, во последните 24 часа се потврдени уште 27 нови случаи на заразата, што дополнително ја зголемува загриженоста за ширењето на епидемијата.
Владините податоци покажуваат дека од почетокот на епидемијата досега починале 91 лице.
Епидемијата беше официјално прогласена на 15 мај во североисточниот дел на земјата, но здравствените експерти предупредуваат дека вирусот веројатно се ширел незабележано и пред официјалното откривање на првите случаи.
Еболата се пренесува преку близок контакт со заразени лица и преку телесни течности. Во изминатите пет децении оваа болест однесе повеќе од 15.000 животи низ африканскиот континент.
Дополнителна загриженост предизвикува фактот што за реткиот сој на вирусот ебола „бундибугјо“, кој стои зад актуелната епидемија, засега нема одобрена вакцина ниту специфичен третман.
Во обид да се спречи натамошното ширење на заразата, Светската здравствена организација и Африканскиот центар за контрола и превенција на болести започнаа шестмесечна програма вредна 518 милиони долари.
Планот предвидува зајакнување на епидемиолошкиот надзор, проширување на лабораториското тестирање и спроведување дополнителни мерки за спречување на инфекциите во погодените области.
