Седум лица се уапсени во Србија под сомнение дека како дел од организирана криминална група краделе гориво од странски бродови кои пловеле по Дунав, соопшти српското Јавно обвинителство за организиран криминал.
Акцијата е спроведена по налог на обвинителството, во соработка со припадници на Секторот за внатрешна контрола на полицијата.
Уапсените се сомничат за здружување за вршење кривични дела и за продолжено кривично дело недозволен промет со акцизни производи.
Според истрагата, од август минатата година до денес, членовите на групата на подрачјето на Белград преточувале поголеми количества евро-дизел од странски бродови што пловеле по Дунав во пластични контејнери сместени во товарни возила.
Потоа горивото го складирале во импровизирани магацини и нелегално го пуштале во промет, без да бидат платени соодветните даноци и акцизи.
Надлежните органи наведуваат дека на овој начин осомничените стекнале противправна имотна корист, чија висина сè уште не е утврдена.
Уапсените ќе бидат спроведени во Обвинителството за организиран криминал, каде ќе бидат сослушани во рамки на истрагата.
