Во голема полициска акција на територијата на Војводина е откриен нелегален нарко-погон, при што се запленети повеќе од 107 килограми наркотични средства, опрема за нивна подготовка и значителна сума пари.
Според информациите на српските медиуми, полициските службеници пронашле 46,3 килограми амфетамин, 61 килограм марихуана и 10 килограми креатин, супстанца која најчесто се користи за зголемување на масата на наркотиците пред нивна продажба.
Во рамки на акцијата бил откриен објект во Нови Карловци кој служел како база за складирање, мешање и препакување на дрога. При претресот била пронајдена и комплетна опрема за подготовка на амфетамин, четири прецизни ваги, мобилни телефони, клучеви од објектот, како и 17.400 евра и 15.000 српски динари, за кои постои сомнение дека потекнуваат од нелегални активности.
Во акцијата се уапсени две лица, Ж.Г. (40) и Б.Ј., двајцата од подрачјето на општина Земун. Тие се осомничени за соизвршителство во кривичното дело неовластено производство и пуштање во промет на наркотични дроги.
По налог на надлежните органи, на осомничените им е одредена мерка задржување до 48 часа, по што ќе бидат изведени пред Вишото јавно обвинителство за понатамошна постапка.
Српските медиуми наведуваат дека акцијата е една од најголемите заплени на дрога во регионот во последниот период и резултирала со целосно разоткривање на мрежа за подготовка и дистрибуција на наркотични средства.
