Речиси 300.000 млади во Хрватска не се вакцинирани против хуманиот папилома вирус (ХПВ), иако вакцината е бесплатна и достапна за сите ученици од петто одделение па сѐ до 25-годишна возраст, предупредија здравствените работници на претставувањето на јавно-здравствената кампања „Биди мРАК“.
Локалната координаторка на проектот за Загреб, Симона Микуљан, истакна дека преку работилници во основните и средните училишта постојано се работи на едукација на младите.
„Податоците покажуваат дека поради различни причини речиси 300.000 млади не се вакцинирани. Оваа година фокусот ни е на младите од 18 до 25 години, па затоа сме многу активни и на социјалните мрежи, каде што често ни помагаат јавни личности и инфлуенсери“, изјави Микуљан.
Лекарите од Центарот за здравје на младите во Загреб велат дека се задоволни од зголемениот интерес за вакцинација против ХПВ.
Докторката по училишна медицина од Наставниот завод за јавно здравје „Д-р Андрија Штампар“, Татјана Петричевиќ Видовиќ, посочи дека податоците за 2025 година покажуваат раст на бројот на примени вакцини.
„Во првите три месеци од годинава се потрошени повеќе од 400 дози вакцина. Тоа ни покажува дека оваа година ќе биде поуспешна кога станува збор за вакцината против рак“, рече таа.
Освен во Центарот за здравје на младите, младите до 25 години можат бесплатно да се вакцинираат и кај избран лекар по училишна и универзитетска медицина, во Наставниот завод „Д-р Андрија Штампар“, како и во Хрватскиот завод за јавно здравје.
Болницата „Свети Дух“ вовела вакцинација против ХПВ и за жени постари од 25 години со одредени медицински индикации.
Гинекологот Ингрид Мартон нагласи дека е исклучително важно младите навреме да се едуцираат за заштита на здравјето и превенција од малигни заболувања.
„Знаеме дека ХПВ е причинител на дури шест видови рак, а вакцината може да го спречи тоа. Младите девојки до 25 години не размислуваат доволно за превенцијата, што се гледа и од недоволниот одѕив на гинеколошките прегледи“, изјави Мартон.
Таа апелираше до родителите да ги вакцинираат своите деца, нагласувајќи дека вакцината спасува животи.
На настанот беа претставени и други бесплатни здравствени услуги достапни за младите до 29-годишна возраст, меѓу кои советувалишта за ментално здравје и гинеколошки прегледи.
Клиничкиот психолог Доротеа Братуша Јурај истакна дека секоја година расте бројот на млади кои бараат психолошка помош.
„Во 2024 година услугите на советувалиштето за ментално здравје ги побарале 1.600 корисници и биле обезбедени 8.000 услуги, додека годинава досега има 900 нови корисници и повеќе од 3.000 услуги“, рече таа.
Помошничката на прочелничката за здравство во Градската управа на Загреб, Мирела Шентија Кнежевиќ, оцени дека Центарот за здравје на младите е единствено место од ваков тип не само во Загреб, туку и во цела Хрватска.
