Речиси еден милион луѓе кои инвестирале во мемкоинот „$TRUMP“ на американскиот претседател Доналд Трамп до крајот на јуни загубиле вкупно 3,81 милијарда долари, покажува анализата на компанијата за криптовалутни податоци Nansen.
Според извештајот, 988.905 инвеститори, односно околу две третини од сите што го купиле мемкоинот, се во загуба. Во пресметката се вклучени и таканаречените нереализирани загуби на инвеститорите кои сè уште ги поседуваат токените.
Во исто време, финансиската пријава на Трамп покажува дека тој остварил приход од 636 милиони долари од истиот криптопроект, како дел од вкупната заработка од најмалку 2,2 милијарди долари од неговите деловни активности во 2025 година.
Според аналитичарите, моделот на мемкоинот му овозможувал на Трамп да заработува од провизии при секоја трансакција, без оглед на тоа дали цената на токенот растела или паѓала.
Мемкоинот „$TRUMP“ беше претставен само неколку дена пред инаугурацијата на Трамп. Неговата цена првично порасна од помалку од еден долар на повеќе од 75 долари, но потоа доживеа драматичен пад. Според најновите податоци, токенот се тргува за околу 1,76 долари, што е пад од 97 проценти во однос на највисоката вредност.
Од Белата куќа ги отфрлија тврдењата дека Трамп профитирал на сметка на своите поддржувачи, нагласувајќи дека неговите политики се во интерес на американските граѓани.
Извештајот наведува дека најголемите добивки ги оствариле мал број искусни криптотрговци кои купиле токени во најраната фаза, додека најголемиот дел од малите инвеститори останале со значителни загуби.
