Премиерот Христијан Мицкоски денеска од Струмица порача дека здравството останува еден од главните приоритети на Владата, при посетата на реконструираниот објект на ЈЗУ Општа болница Струмица.
Тој истакна дека станува збор за проект кој се очекувал со децении и најави дека по завршувањето на преостанатите активности за доопремување, објектот целосно ќе биде ставен во функција на почетокот на септември.
„Четириесетина години се чекаше да се случи ова што денеска го гледаме. Остануваат уште завршни активности и до крајот на август очекуваме сè да биде комплетирано, по што објектот целосно ќе биде пуштен во употреба“, рече Мицкоски.
Тој нагласи дека Владата е посветена на реализација на проектите што им биле ветени на граѓаните и дека паралелно се работи на завршување на започнатите и отпочнување на нови капитални инвестиции.
Според премиерот, во здравствениот сектор веќе се обезбедуваат финансиски и организациски предуслови за реализација на повеќе значајни проекти, меѓу кои Клиничката болница во Штип, студентскиот дом и новата зграда на Медицинскиот факултет, здравствениот дом во Кичево со проширена дејност, како и Клиничката болница во Тетово.
Мицкоски посочи дека се разгледуваат и идните чекори за изградба на нов клинички центар во Скопје.
Освен за здравството, премиерот најави и нови инфраструктурни проекти во источниот дел од државата. Како што рече, во текот на неделата ќе биде објавен тендер за изработка на физибилити-студија и проектно решение за експресен пат меѓу Радовиш и Струмица, кој во иднина треба да се поврзе со патниот правец кон Бугарија.
Тој потсети и на проектите за поврзување на Страцин со Крива Паланка, како и на планираниот експресен пат меѓу Кочани, Виница и Делчево.
На крајот од обраќањето, Мицкоски им се заблагодари на раководството на болницата, Министерството за здравство, Фондот за здравствено осигурување, пратениците, градоначалниците и медицинскиот персонал за нивната посветеност во реализацијата на проектот.
„Сакам овој објект да има што помалку корисници, бидејќи тоа би значело дека сме поздрава нација. Но оние на кои ќе им биде потребен, да добијат здравствена услуга во современи и европски услови“, порача Мицкоски.
