СДСМ преку соопштение оцени дека најавената реконструкција на Владата претставува козметичка промена која нема да донесе суштински резултати за граѓаните, туку, како што велат од партијата, е обид да се прикријат неуспесите на актуелната власт.
Од опозициската партија наведуваат дека со реконструкцијата се менуваат само министерските позиции, додека, според нив, носителите на клучните политики и центарот на одлучување остануваат исти.
„Наместо резултати, денеска ќе гледаме нов политички театар. Станува збор за козметичка промена на фотелјите во истата структура“, се наведува во партиското соопштение.
Според СДСМ, реконструкцијата доаѓа во период кога државата се соочува со економски предизвици, раст на цените и застој на европскиот интеграциски процес.
Партијата смета дека со кадровските промени не се менуваат владините политики, ниту се презема одговорност за, како што наведуваат, досегашните неисполнети очекувања.
„Граѓаните нема да добијат повисоки плати, пониски цени, подобро здравство, поквалитетно образование или побрз напредок кон Европската Унија. Се менуваат само фотелјите, додека клучните ресори остануваат во истите раце“, велат од СДСМ.
Од партијата додаваат дека реконструкцијата претставува признание дека Владата не ги испорачала очекуваните резултати и оценуваат дека станува збор за „стара Влада во нова амбалажа“.
