Премиерот Христијан Мицкоски, образложувајќи ја реконструкцијата на Владата во Собранието, порача дека промените во министерскиот состав треба да донесат нова енергија, побрзо темпо и уште поголема одговорност во работењето на извршната власт.
Тој истакна дека реконструкцијата не претставува отстапување од досегашниот курс, туку продолжување на реформите со засилен интензитет.
„Пред вас не стои само предлог за избор на нови министри. Пред вас стои предлог за нова енергија, за ново темпо, за нова фаза во развојот на државата. За Влада која нема да биде задоволна со постигнатото, туку ќе биде гладна за нови резултати“, рече Мицкоски.
Според него, министерските функции не треба да се сфаќаат како привилегија, туку како обврска кон граѓаните.
„Министерската функција не е привилегија. Таа е одговорност. Таа е обврска кон секој човек кој очекува подобар живот“, нагласи премиерот.
Во своето обраќање, Мицкоски ги претстави кандидатите за новите министри, меѓу кои Јетон Шасивари за правда, Борче Серафимовски за земјоделство, Сашо Клековски за здравство, Ѓоко Велковски за социјална политика, Иван Стоилковиќ за локална самоуправа, Седат Сулејмани за култура и туризам, Агон Ферати за односи меѓу заедниците и Ерџан Демир за министер без ресор.
Премиерот оцени дека во изминатите две години биле поставени темелите за обнова на државата и порача дека Владата ќе продолжи со реформите и инвестициите.
„Не барам доверба за поединци, ниту за една политичка партија. Барам доверба за продолжување на процесот во кој државата повторно се исправи на нозе и покажа дека Македонија може повторно да гради, да создава и да победува“, рече Мицкоски.
На крајот од говорот тој изрази уверување дека „најдобрите години на Македонија не се зад нас, туку пред нас“, повикувајќи на единство и заедничка работа за идните генерации.
