Рекорден број прекршоци за шест часа: 825 возачи возеле побрзо од дозволеното

Дури 825 прекршоци за пречекорување на дозволената брзина констатирало Министерството за внатрешни работи за само шест часа, при акциска контрола спроведена на 23 октомври на територијата на целата држава.

Контролата била спроведена од Секторот за сообраќајни работи при МВР, во периодот од 10 до 16 часот, со цел откривање и санкционирање на возачите кои управуваат возила со брзина поголема од дозволената.

— реклама —

Според податоците на МВР, од вкупниот број констатирани прекршоци, 398 се однесуваат на возачи кои ја пречекориле дозволената брзина во населено место, додека 427 прекршоци биле евидентирани надвор од населени места.

— реклама —

Во рамки на контролата биле откриени и два случаи на кривичното дело „безобѕирно управување со моторно возило“, согласно член 297-а од Кривичниот законик.

Дополнително, полициските службеници констатирале уште 89 прекршоци од друг вид.

— реклама —

Од МВР информираат дека за сите утврдени прекршоци се преземени соодветни мерки согласно законските прописи.

Министерството најавува дека и во наредниот период ќе продолжи со спроведување акциски сообраќајни контроли, со цел зголемување на безбедноста на патиштата.

Од МВР упатуваат апел до сите учесници во сообраќајот да бидат одговорни и внимателни, да ги почитуваат ограничувањата на брзината и да се придржуваат до сообраќајните правила и прописи.