Xiaomi ги објави резултатите за 2025 година, и се пофали со раст на приходите од 25%. Вкупната добивка достигна 4,9 милијарди евра, а најголемо изненадување доаѓа од секторот на електрични автомобили.
Првпат, сегментот на електрични возила во компанијата оствари позитивен оперативен приход – приходите се поголеми дури за 223,8% во однос на претходната година, па е надмината границата од 13 милијарди евра.
Со испорачани над 411.000 возила во 2025 година, Xiaomi се позиционира како сериозен играч во автоиндустријата – моделот Xiaomi YU7, луксузен SUV, стана најпродаван во својата класа во Кина, додека новиот Xiaomi SU7 забележува неверојатни 30.000 нарачки во првите три дена од продажбата во март 2026.
Иако автомобилите го привлекуваат фокусот, бизнисот со паметни телефони останува темел на компанијата со приход од 23,4 милијарди евра. Xiaomi петта година по ред ја задржа третата позиција во светот со 165,2 милиони испорачани примероци.
Во Кина, секој четврти продаден Xiaomi телефон сега спаѓа во категоријата над 375 евра, благодарение на успехот на модели како Xiaomi 17 Ultra.
Секторот IoT (Интернет на работите) и производите за животен стил исто така бележат историски максимуми со приход од 15,5 милијарди евра. Над една милијарда уреди сега се поврзани на AIoT платформата на Xiaomi, што е раст од речиси 20% во една година. Посебен успех е остварен во сегментот на бела техника и носливи уреди.
Иднината на компанијата се потпира на агресивни инвестиции во вештачка интелигенција и роботика, соопшти Xiaomi. Во 2025, вложени се 4,1 милијарда евра во истражување и развој, а планираат во наредните три години да вложат уште 7,5 милијарди евра само во AI. Во фабриката за автомобили, на пример, хуманоидниот робот Xiaomi-Robotics-0 веќе работи на производните линии со прецизност поголема од 90%, велат од кинеската компанија.
