Четворица републикански членови на американскиот Конгрес со грчко потекло јавно се спротивставија на предложената продажба на американски мотори Ф110 за борбени авиони на Турција, оценувајќи дека Анкара и натаму ја поткопува стабилноста во Источниот Медитеран и не треба повторно да биде вклучена во програмата за борбените авиони Ф-35 додека целосно не ги исполни барањата на американскиот закон.
Конгресмените Гас Билиракис, Никол Малиотакис, Мајк Харидополос и Џими Патронис во заедничко соопштение изразија „длабока загриженост“ поради информациите дека администрацијата на американскиот претседател Доналд Трамп има намера да продолжи со предложената воена продажба.
„Како американски конгресмени со грчко потекло, длабоко сме загрижени поради извештаите за предложената продажба на мотори за борбени авиони на Турција“, наведуваат тие.
Според нив, Турција и понатаму претставува дестабилизирачки фактор во регионот поради нејзините спорни поморски претензии, продолжената, како што наведуваат, нелегална окупација на северниот дел на Кипар, како и сè поострата реторика кон Израел.
Во соопштението се оценува дека Источниот Медитеран има потенцијал да стане регион на трговска соработка, енергетски развој и безбедност, но политиките на Анкара ги загрозуваат тие напори, како и интересите на клучните американски сојузници.
Конгресмените дополнително посочуваат дека блиските односи на Турција со Хамас, како и фактот што Анкара останува единствената членка на НАТО која не воведе санкции против Русија по инвазијата врз Украина, отвораат сериозни прашања за нејзината доверливост како сојузник.
Тие соопштија дека веќе остваруваат контакти со администрацијата на Трамп и со раководството на Претставничкиот дом за да добијат дополнителни информации за предложената продажба на моторите.
Воедно, повторија дека се против какви било обиди Турција повторно да биде вклучена во програмата Ф-35 сè додека целосно не ги исполни одредбите од Законот за спротивставување на американските противници преку санкции (CAATSA), врз основа на кој САД воведоа санкции откако Анкара го набави рускиот противвоздушен систем С-400.
Нивната реакција доаѓа во време кога во Вашингтон се интензивира политичката дебата по одлуката администрацијата официјално да го извести Конгресот за предложената продажба на моторите Ф110, додека паралелно се разгледуваат и можни законски механизми што во иднина би ѝ овозможиле на Турција повторно да добие пристап до борбените авиони Ф-35.
