Државниот завод за ревизија утврдил низа неправилности и неусогласености во работењето на Државниот пазарен инспекторат (ДПИ) за 2024 година. Поради констатираните состојби, ДЗР изразил неповолно мислење за реалноста и објективноста на финансиските извештаи, како и мислење со резерва за усогласеноста со законската регулатива.
Во текот на 2024 година, ДПИ извршил 28.263 инспекциски надзори – 21.108 редовни, 5.106 вонредни и 2.049 контролни. Надзорите ги спроведувале 148 инспектори, односно само 47 отсто од 313 систематизирани работни места. Дополнително, пет одделенија немале раководител.
Ревизијата утврдила дека регистрите и информацискиот систем за управување со инспекцискиот надзор сè уште не се воспоставени, додека апликацијата „Е-инспектор“ не е целосно ставена во употреба. ДПИ нема ниту единствена и целосна електронска база на податоци со методологија за проценка на ризик, што го отежнува планирањето и следењето на инспекциските активности.
Во периодот јануари–октомври 2024 година биле донесени 19 решенија за распоредување без обезбедени средства во буџетот и без да бидат предвидени во годишниот план за вработување. Во декември истата година, 17 одлуки биле поништени.
ДЗР посочува и на слабости во Одделението за инспекциски надзор за безбедност на производи. Од предвидените 14 работни места, на крајот на 2024 година биле пополнети само пет. Во периодот 2022–2025 година, преку поддршка од меѓународни проекти биле вршени лабораториски анализи во странство, врз основа на кои од пазарот биле повлечени 40 производи.
Ревизијата укажува на неизвесност дали овие контроли ќе продолжат по завршувањето на проектите, поради ограничените средства во буџетот на ДПИ.
Утврдени се недостатоци и во чувањето на одземените предмети, бидејќи ДПИ нема соодветни објекти за нивно складирање до предавањето на Агенцијата за управување со одземен имот.
Во финансиското работење, пописот на средствата и обврските не бил целосно спроведен, а во материјалната евиденција не биле евидентирани канцелариски материјали во вредност од 1,107 милиони денари, обрасци поврзани со инспекцискиот надзор во вредност од 791 илјада денари и автомобилски гуми во вредност од 249 илјади денари.
ДЗР ја истакнува и статусната промена на ДПИ, кој по законските измени продолжува да функционира како орган во состав на Министерството за економија и труд, без својство на правно лице.
За надминување на утврдените слабости, ревизијата дала препораки за зајакнување на човечките ресурси, воспоставување електронски регистри и информациски систем, подобрување на финансиската и материјалната евиденција, унапредување на инспекциските постапки и обезбедување услови за чување на одземените предмети и континуирани контроли на безбедноста на производите.
