Ревизија со резерва за Комисијата за заштита на конкуренцијата: Констатирани сериозни слабости

Државниот завод за ревизија (ДЗР) го објави извештајот од извршената ревизија на финансиските извештаи и усогласеноста на работењето на Комисијата за заштита на конкуренцијата за 2024 година, при што изрази мислење со резерва.

— реклама —

Според ДЗР, ревизијата утврдила повеќе слабости во финансиското работење и почитувањето на законската регулатива. Меѓу констатираните неправилности се неусогласеност меѓу материјалната и сметководствената евиденција поради отсуство на вредносни показатели во пописните листи, непреземање мерки за осигурување на имотот, како и отсуство на единствена евиденција за предметите во кои се изречени глоби.

— реклама —

Ревизорите утврдиле и слабости во дел од постапките за јавни набавки, односно во тендерската документација и техничките спецификации.

Од ДЗР информираат дека до одговорните лица во Комисијата биле упатени препораки за надминување на утврдените состојби, а во текот на ревизијата биле прифатени корекции со кои активата и пасивата се зголемени за 13,101 милиони денари.

— реклама —

Во извештајот е наведено и дека Комисијата за заштита на конкуренцијата во текот на 2024 година не работела во полн состав.

Од Комисијата доставиле забелешка на воведниот дел од нацрт-извештајот, која, како што појаснува ДЗР, била разгледана и оценета како известување за дополнителна надлежност на институцијата.