Државниот завод за ревизија (ДЗР) утврди сериозни неправилности во финансиското работење на ЈП „Паркинзи на Општина Центар“ – Скопје за 2024 година, поради што даде неповолно мислење за финансиските извештаи и мислење со резерва за усогласеноста на работењето со законската регулатива.
Според ревизорскиот извештај, претпријатието не уплатило комунална такса во износ од 86,3 милиони денари во буџетот на Општина Центар. Најголемиот дел од овие обврски, околу 79 милиони денари, се однесуваат на периодот од 2019 до 2023 година.
Ревизијата покажала и дека претпријатието има побарувања од над 80 милиони денари, при што околу 20,4 милиони денари се постари од шест години. За нив, како што наведува ДЗР, не биле преземени навремени мерки за наплата, ниту било извршено нивно обезвреднување.
Констатирани се и слабости во евидентирањето на опремата и градежните објекти, непресметана амортизација на дел од средствата, неправилности при пописот, како и пропусти во сметководственото работење.
Дополнително, ревизорите утврдиле неправилности во пресметката и исплатата на платите, слабости во благајничкото работење и недостатоци во системот на внатрешна ревизија.
Во извештајот се посочуваат и пропусти во постапките за јавни набавки, меѓу кои поставување несразмерни услови за учество, прифаќање понуди над проценетата вредност без соодветна анализа, како и непочитување на законските рокови за објавување на известувањата.
За надминување на утврдените состојби, Државниот завод за ревизија доставил препораки до надлежните институции и одговорните лица со цел отстранување на констатираните неправилности.
