Советникот во Општина Аеродром и претседател на ОО СДСМ Аеродром, Милутин Ристески, обвини дека локалната власт ќе потроши 138 милиони денари за, како што вели, минимални инфраструктурни зафати кои не одговараат на најавите.
Според него, наместо сериозни реконструкции, станува збор за пет улици и повеќе кратки краци и тротоари.
„Вкупно 138 милиони денари Општина Аеродром ќе потроши на реконструкција на 5 улици и 13 сокачиња и тротоари“, изјави Ристески.
Тој тврди дека проектите се претставуваат како поголеми отколку што се во реалноста, наведувајќи примери со краци од неколку десетици метри.
„На пример првиот крак на кракот 41 од ул. Т. Чангов со должина од само 27 метри, вториот со должина од 30 метри и третиот со должина од 24 метри пропагандата на ВМРО-ОКГ во Аеродром ги брои како 3 различни улици“, рече Ристески.
Дополнително, тој обвини дека договорот за јавна набавка е склучен со компанија која, според него, е поврзана со владејачката партија.
„И се тоа преку договор за јавна набавка со омилената фирма од тендерските шеми на ВМРО-ОКГ, Пирамид Билдинг солушнс“, изјави Ристески.
Во изјавата се наведува дека во изминатите години не се реализирани клучни инфраструктурни проекти во општината.
„Петта година по ред откако ВМРО-ОКГ е на власт во Општина Аеродром и Град Скопје не е реконструиран ниту еден булевар, не е изградена ниту една вело патека“, посочи Ристески.
Тој направи и споредба со претходниот мандат, кога, како што наведе, биле реализирани повеќе значајни инфраструктурни зафати.
На крајот, Ристески упати критика до градоначалникот Дејан Митески, повикувајќи го на поодговорен пристап.
„Го повикуваме градоначалникот Дејан Митески да престане да ја замајува јавноста со евтина пропаганда и сериозно да се фати за работа“, изјави Ристески.
