Поранешната обвинителка Ленче Ристоска тврди дека предметот „Талир 2“ ѝ бил одземен со цел да се избегне конфискацијата на имотот на ВМРО-ДПМНЕ, реагирајќи по ослободителната пресуда за поранешниот премиер Никола Груевски и одбивањето на барањето за конфискација на „Белата палата“ и другите партиски седишта.
Ристоска, која седум и пол години го водеше предметот и поднесе оставка откако беше отстранета од него, оцени дека постојат повеќе околности кои, според неа, го потврдуваат уверувањето дека случајот ѝ бил одземен за да се спречи конфискацијата на имотот.
Таа ја оспори ослободителната пресуда, посочувајќи дека судот, иако навел дека доказите и нивната оценка останале непроменети, донел сосема поинаква одлука од првата постапка, кога беше изречена осудителна пресуда.
Ристоска нагласи дека измените на Кривичниот законик од 2023 година не ја отстрануваат противречноста бидејќи, според неа, изменетото обвинение содржело и ново дејствие кое не било опфатено со декриминализацијата и се однесувало на законските обврски на Никола Груевски како претседател на ВМРО-ДПМНЕ.
Поранешната обвинителка предупреди и дека предметот наскоро влегува во завршната фаза на застареност, оценувајќи дека ваквиот развој на настаните ја отежнува можноста обвинителството да бара конфискација на имотот во посебна постапка.
Таа се осврна и на постапувањето на обвинителот кој го презеде предметот, наведувајќи дека на едно од последните рочишта обвинителството не се спротивставило на барањето за одложување, што, според неа, придонело предметот да заврши само со првостепена пресуда пред истекот на роковите.
Ристоска изрази очекување дека Обвинителството ќе поднесе жалба на пресудата. Од друга страна, Кривичниот суд вчера донесе ослободителна пресуда за Никола Груевски во предметот „Талир 2“, повикувајќи се на измените на Кривичниот законик.
