На денешната четириесет и втората седница Советот на јавните обвинители го усвои барањето на Ленче Ристоска за престанок на функцијата јавен обвинител во ОЈО Скопје.
Претседателот на Советот, Башким Бесими, информираше дека Ристоска на 2 април годинава поднела барање за престанок на функцијата јавен обвинител по сопствено барање.
„Овде нема расправа, констатирам дека е усвоено барањето за престанок на функцијата на Ленче Ристоска“, изјави Бесими.
Советот претходно донесе одлука за продолжување на функцијата на Кети Петкова додека ѝ трае мандатот како член на Советот до 26 јули 2027 година.
На денешната седница Советот ја разгледа и едногласно ја прифати писмената изјава за продолжување на вршењето на функцијата во согласност со Законот за работните односи на членот на Советот, Кети Петкова.
Претседателот на Советот, Бесими, информира дека на 26 март годинава добиле одговор од Собранието, со кој го известува Советот дека во согласност со Законот за Советот на ЈО, Советот може да ѝ го продолжи мандатот.
Светлана Стојковиќ изјави дека колешка Петкова на 15 август годинава ги испопнува условите за старосна пензија, а во согласност со законот има право да побара продолжување на функцијата додека ѝ трае мандатот до 26 јули 2027 година.
Петкова, во согласност со законот, се иззема од оваа точка и не учествуваше во расправата.
