Родителите на тинејџерите од сообраќајката во Марино бараат одземање на имунитетот на пратеникот на Левица, Сашко Јанчев

Семејствата на двете малолетни жртви од септемвриската несреќа во Марино испратија официјално барање до претседателот на Собранието, Африм Гаши, со кое бараат да биде покрената постапка за одземање на имунитетот на пратеникот од Левица, Сашко Јанчев. Тие велат дека се чувствуваат обесправено и дека имаат страв дека неговата политичка функција може да го наруши интегритетот на идниот судски процес.

— реклама —

Несреќата се случи на 14 септември 2025 година, кога возило „Хјундаи Тусон“, управувано од Јанчев, се судри со мопед на кој се превезувале 16-годишниот М.Д. и 13-годишната А.Т. Повредите беа тешки за двајцата, а момчето подоцна, на 9 октомври, почина во болница. Девојчето останува на лекување и со сериозни последици од ударот.

— реклама —

Во писмото до Собранието, родителите објаснуваат дека обвинение сè уште не е поднесено и дека токму затоа е неопходно пратеникот да не ужива дополнителна заштита која би можела да ја забави или да влијае врз постапката. Според Уставот и Деловникот, секое барање за одземање имунитет мора најпрво да се достави до претседателот на Собранието, а потоа Комисијата за деловнички и мандатно-имунитетни прашања одлучува дали ќе го препрати на гласање пред пратениците.

— реклама —

По несреќата, на Јанчев му беа одземени пасошот и возачката дозвола како мерки на претпазливост. Од Левица тврдат дека тој не бил под дејство на алкохол и дека мопедот бил нерегистриран, неисправен и управуван од малолетник без дозвола и без кацига, кој се забил во возилото.

— реклама —

Родителите, пак, инсистираат дека правдата мора да биде еднаква за сите и дека одземањето на имунитетот е единствен начин да се обезбеди фер постапување на институциите. Случајот продолжува да ја бранува јавноста, која очекува брза и транспарентна реакција од Обвинителството и Собранието.