Родителите на загинатите во „Пулс“ по барањето на одбраната за супервештачење: Како вештак што не може да одговори на сите прашања ќе го оспори целото вештачење

Барањето на одбраната за супервештачење во судскиот процес за трагедијата во дискотеката „Пулс“ во Кочани предизвика реакција кај родителите на загинатите. Тие бараат да се разгледа обемот на вештачењата, како и стручната надлежност на лицата кои дале мислења во постапката.

Родителите посочуваат дека вештакот ангажиран од одбраната се изјаснувал од градежен аспект, но според нив, од неговите одговори произлегува дека не може да даде мислење за сите прашања опфатени во вештачењето на обвинителството.

— реклама —

„Логичното прашање е: ако вештакот на одбраната се изјаснува само од градежен аспект и од неговите одговори се гледа дека не може да одговори на сите прашања што произлегуваат од вештачењето на обвинителството, како може неговото мислење да се користи за оспорување на целокупното вештачење?“, прашуваат родителите.

Тие наведуваат дека вештачењето на обвинителството опфаќа повеќе области, меѓу кои урбанизам, градежништво, Дирекцијата за заштита и спасување и противпожарна заштита, како и други прашања поврзани со случајот.

— реклама —

Оттука, според нив, доколку вештакот на одбраната нема стручна можност да се изјасни за сите овие области, неговото мислење може да се однесува само на делот за кој е повикан и за кој има соодветна стручност.

— реклама —

„Затоа, ако одбранбениот вештак не може стручно да се изјасни за сите тие области, тогаш неговото мислење е ограничено на она за што е повикан и за што има стручна компетентност“, велат родителите.

Во однос на супервештачењето, тие сметаат дека конечната оценка треба да ја даде судот, кој треба да утврди дали меѓу постојните вештачења навистина постојат суштински и неразрешливи спротивности или, пак, повторно се бара вештачење затоа што постојното не ги потврдува тезите на одбраната.

— реклама —

Родителите очекуваат судот прецизно да ги утврди границите на секое вештачење, како и стручноста и надлежноста на вештаците.

„Во овој случај не станува збор за обична стручна расправа, туку за утврдување на одговорноста за најголемата трагедија што ни се случи“, порачаа тие.