Родителите на жртвите од „Пулс“: Обвинителството откри сериозни противречности во исказот на вештакот Русевски

Здружението на родителите на загинатите деца во трагедијата во Кочани изрази јавна поддршка за Јавното обвинителство и неговото постапување на судењето за пожарот во дискотеката „Пулс“, во кој животот го загубија 63 лица. Родителите особено го поздравуваат начинот на кој обвинителството го испрашувало вештакот Петре Русевски на претходното судско рочиште, оценувајќи дека преку вкрстените прашања биле откриени сериозни противречности во неговиот исказ.

„63 згаснати животи. 63 ангели. 63 причини вистината да излезе на виделина!“, порачуваат родителите во своето обраќање.

— реклама —

Според нив, обвинителството преку прецизни и аргументирани прашања успеало да ја доведе во прашање веродостојноста на тврдењата на Русевски, кои, како што наведуваат, биле спротивни на стручните наоди, заклучоците и доказите на вештаците од Градежниот факултет.

Родителите сметаат дека особено значајно е тоа што обвинителството не дозволило противречностите да останат неразјаснети, туку го соочило вештакот со конкретни факти и докази.

— реклама —

„Во судница во која се одлучува за одговорноста за изгубени човечки животи, не смее да има простор за релативизирање на фактите, за селективно толкување на доказите или за обиди вистината да се прикаже поинаку од она што навистина се случило“, се наведува во обраќањето.

Тие очекуваат обвинителството да продолжи со истата решителност и професионалност до целосното расветлување на трагедијата и утврдувањето на одговорноста.

Во својата порака родителите потсетуваат дека зад судските рочишта, вештачењата и правните аргументи стојат семејства кои засекогаш ги загубиле своите најблиски.

— реклама —

„Стојат 63 прерано згаснати животи. 63 насмевки што никогаш повеќе нема да ги видиме. 63 неостварени соништа и иднини кои сурово беа прекинати. Стојат родители што никогаш повеќе нема да ги прегрнат своите деца, семејства чии домови засекогаш останаа празни и една цела заедница која продолжува да живее со рана што никогаш нема целосно да зарасне“, наведуваат тие.

Родителите нагласуваат дека судскиот процес за нив не претставува само правна постапка, туку борба за вистината, достоинството на загинатите и правдата што им ја должи општеството.

„Нашите 63 ангели не можеме да ги вратиме. Но можеме и мораме да се избориме нивната смрт да не остане без вистина, без одговорност и без правда“, порачуваат родителите.

Обраќањето го завршуваат со пораката: „Нема заборав. Нема молк. Нема откажување. За нашите 63 ангели – вистина и правда!“