Родителите на загинатите во „Пулс“ реагираат на барањето на Шилегов: Случајот не може да се споредува со други предмети

Родителите на загинатите во пожарот во дискотеката „Пулс“ реагираат на повторното барање на адвокатот Петре Шилегов Јавното обвинителство да го преиспита кривично-правниот настан, оценувајќи дека случајот не може да се споредува со други предмети бидејќи станува збор за различни околности и основи на одговорност.

— реклама —

Тие посочуваат дека обвинетите се на обвинителната клупа поради наводното незаконско постапување и непостапување во врска со работата на објектот, кој, според нив, незаконски функционирал 13 години.

— реклама —

Родителите прашуваат кој бил задолжен да ја гарантира безбедноста на граѓаните и да го контролира законското работење на објектот, како и кој требало да ги проверува безбедносните планови, елаборатите, минимално-техничките услови и лиценците. Притоа ги посочуваат Дирекцијата за заштита и спасување, Министерството за економија, Државниот пазарен инспекторат и другите надлежни контролни органи.

Во нивната реакција се отвора и прашањето за проектната документација на „Венци Проект“, за која на денешното рочиште сведочел вештакот. Според изнесеното во судницата, документацијата била изработена пред реконструкцијата на дискотеката. Родителите прашуваат кој ја проверил и одобрил и дали биле испочитувани законските постапки за нејзиното користење.

— реклама —

Тие нагласуваат дека документацијата не смее да послужи за прикривање незаконитости или оправдување на институционалните пропусти.

— реклама —

„Ако надлежните навреме постапеле и го затвореле објектот, ‘Пулс’ немало да работи на 16 март 2025 година! А цената за тие пропусти ја плативме ние, родителите, со најсветото што го имавме – нашите деца“, порачуваат родителите.