Ројтерс: Судовите пресудија дека администрацијата на Трамп 75 пати го прекршила Првиот амандман

Администрацијата на американскиот претседател Доналд Трамп го прекршила Првиот амандман од Уставот на САД, кој ги гарантира слободата на говор, вероисповед и печат, во најмалку 75 случаи, покажува анализата на агенцијата „Ројтерс“.

— реклама —

Според анализата, федералните судии донеле 75 пресуди во кои оцениле дека администрацијата ги ограничувала правата загарантирани со Првиот амандман. Меѓу другото, судовите утврдиле дека бил ограничуван говорот на политички противници, биле преземани мерки против универзитети и адвокатски канцеларии, а во одредени случаи била употребена и прекумерна сила за време на протести.

— реклама —

Белата куќа ги отфрла ваквите пресуди, оценувајќи дека федералните судии со своите одлуки ја попречуваат волјата на американските гласачи.

— реклама —

„Ројтерс“ наведува дека за време на вториот мандат на Трамп, пониските федерални судови разгледувале вкупно 93 предмети поврзани со наводни прекршувања на Првиот амандман, а администрацијата изгубила во најголемиот дел од нив. За споредба, во мандатот на Џо Бајден биле разгледувани 27 такви случаи, од кои администрацијата изгубила во 13.

— реклама —

Трамп во изборната кампања најавуваше дека ќе стави крај на, како што тврдеше, владината цензура и ќе ја заштити слободата на изразување, но неговите критичари сметаат дека подоцнежните мерки биле насочени кон политички противници и станале предмет на бројни судски спорови.