Американскиот државен секретар Марко Рубио оваа недела ќе има серија средби со лидерите од земјите од Персискиот Залив, во обид да ги увери регионалните сојузници во придобивките од неодамна постигнатиот мировен договор меѓу САД и Иран.
Рубио денеска ќе престојува во Обединетите Арапски Емирати, по што ќе ги посети Кувајт и Бахреин, каде што ќе се сретне со претставници на Советот за соработка на арапските земји од Заливот (ГЦЦ), организација во која членуваат и Саудиска Арабија, Катар и Оман.
Според медиумските извештаи, меѓу клучните точки на договорот се отсуството на ограничувања за иранската балистичка програма, предлогот за фонд за обнова вреден 300 милијарди долари, како и одредби кои би можеле дополнително да го зголемат регионалното влијание на Техеран.
Земјите членки на ГЦЦ се стратешки партнери на Вашингтон и во изминатиот период обезбедуваа логистичка поддршка за американските активности во регионот. Поради тоа, дел од нив беа изложени и на ирански ракетни напади.
Одредени земји од Заливот, според аналитичарите, се изненадени и незадоволни од привремениот договор, стравувајќи дека тој може да доведе до нормализација на односите меѓу САД и Иран и со тоа да ја промени безбедносната рамнотежа во регионот.
Дополнителна тежина на посетата на Рубио ѝ дава и фактот што Обединетите Арапски Емирати, Саудиска Арабија, Катар, Кувајт и Бахреин се домаќини на американски воени бази кои претставуваат клучен дел од американската безбедносна стратегија на Блискиот Исток.
Поранешниот заменик-помошник државен секретар за Ирак и Иран, Ендру Пик, оцени дека Рубио би можел да ги смири загрижените сојузници потсетувајќи ги дека претседателот Доналд Трамп и претходно водел цврста политика кон Иран и дека Вашингтон ќе реагира доколку Техеран не ги исполни преземените обврски.
