Рубио повика на заедничка акција на земјите-членки на Г20

Американскиот државен секретар Марко Рубио повика на поголема соработка меѓу членките на Г20, предупредувајќи дека економските и геополитичките кризи ја загрозуваат глобалната трговија, снабдувањето со енергија и храна, како и слободата на пловидбата. Апелот го упати на состанокот на министрите за надворешни работи на групата во Атланта.

— реклама —

„Г20 мора да работи заедно за да се соочи со овие закани. Предизвиците на кои им се посветивме за време на претседателството на претседателот Доналд Трамп се повеќеслојни и меѓусебно поврзани, па такви мора да бидат и решенијата“, рече Рубио во воведното обраќање.

Сепак, состанокот започна во атмосфера на дипломатски тензии откако неколку дипломати одбија да се фотографираат заедно со рускиот министер за надворешни работи Сергеј Лавров. Поради тоа, САД го откажаа традиционалното групно фотографирање на министрите за надворешни работи на Г20, објави ДПА.

— реклама —

Германскиот министер за надворешни работи Јохан Вадефул уште пред почетокот на собирот изјави дека најверојатно воопшто нема да има заедничка фотографија.

— реклама —

„Нема да има заедничка фотографија на која нашите европски партнери ќе бидат прикажани заедно со господинот Лавров“, рече Вадефул, посочувајќи дека причината е незадоволството на Западот поради руската војна во Украина.

„Нема нормалност со Русија. Мораме тука, на маса, да ги размениме нашите спротивставени ставови“, додаде германскиот министер, оценувајќи дека е важно да се води дискусија, но и да се избегне испраќање погрешни визуелни пораки.

Вадефул повторно се заложи за дипломатско решение на конфликтот со Иран и за ставање крај на блокадата на Ормускиот Теснец, кој има витално значење за глобалното снабдување со енергија.