Американскиот државен секретар Марко Рубио порача дека САД се надеваат оти Куба ќе избере „поинаков пат“, предупредувајќи ги оние што сметаат дека можат да го дочекаат крајот на администрацијата на претседателот Доналд Трамп без промени.
„Се надеваме дека Куба ќе избере поинаков пат и дека некои од луѓето кои ја контролираат кубанската влада ќе ги отворат очите за реалноста со која се соочуваат“, изјави Рубио за „Фокс њуз“.
Администрацијата на Трамп претходно соопшти дека нејзина цел е промена на комунистичката влада на Куба.
Рубио оцени дека дел од луѓето на Куба сè уште веруваат дека можат да го дочекаат крајот на актуелната американска администрација без да направат промени.
„За жал, меѓу луѓето кои таму продолжуваат да извикуваат револуционерни слогани, премногу од нив сè уште веруваат дека можат да го дочекаат крајот на оваа администрација и да не направат никакви промени или да не преземат ништо. Грешат и ќе ја научат лекцијата на потешкиот начин ако не се поправат“, рече Рубио.
САД претходно годинава воведоа нафтена блокада кон Хавана, што создаде дополнителен притисок врз Куба, која се соочува со недостиг на гориво и прекини на електричната енергија.
Кубанскиот министер за надворешни работи Бруно Родригез во саботата пред Генералното собрание на ОН изјави дека Куба секогаш ќе биде отворена за дијалог со Вашингтон.
Во меѓувреме, Трамп во текот на викендот изјави дека очекува САД и Куба да постигнат договор и дека не смета оти ќе биде потребна воена акција.
