Рубио пред сенаторите: Ја уништивме иранската воена инфраструктура, нивната морнарица е на дното на океанот

Американскиот државен секретар Марко Рубио пред сенаторите на Капитол Хил ја бранеше американската стратегија во конфликтот со Иран, тврдејќи дека операцијата против Техеран сериозно ја ослабнала иранската воена моќ и спречила развој на нуклеарната програма.

За време на сослушувањето, Рубио изјави дека целта на администрацијата на американскиот претседател Доналд Трамп била да го спречи Иран да достигне „точка на имунитет“, односно состојба во која никој повеќе не би можел воено да реагира на неговите нуклеарни амбиции.

— реклама —

Според него, Иран се обидувал да изгради масивен конвенционален штит составен од ракети, беспилотни летала и морнарица, зад кој би го продолжил развојот на нуклеарната програма.

„Операцијата беше многу успешна. Драматично ја деградираше иранската одбранбена индустрија, особено ракетната програма и капацитетите за производство на дронови“, рече Рубио.

— реклама —

Тој додаде дека иранската морнарица практично престанала да постои.

„Денес не постои иранска морнарица. Таа лежи на дното на океанот“, изјави Рубио, додавајќи дека останале само мали чамци опремени со митралези.

— реклама —

Рубио потврди и дека по прекинот на огнот Вашингтон вовел блокада кон Иран, тврдејќи дека Техеран не го исполнил договорот за повторно отворање на Ормускиот теснец.

„Ако Иран го затвори теснецот за сите, тогаш и ние ќе го затвориме за нив“, изјави тој, наведувајќи дека блокадата секојдневно му нанесува стотици милиони долари загуби на Иран.

Во исто време, американскиот државен секретар откри дека преку посредници се водат индиректни преговори со Техеран и оцени дека напредок може да има „уште денес, утре или следната недела“.

Од друга страна, демократските сенатори ја обвинија администрацијата дека ги прикрива вистинските трошоци од војната и избегнува детални извештаи пред Конгресот. За време на расправата беа поставени прашања за американските загуби, намалените резерви на системите „Патриот“, растот на цените на горивата и загинувањето на 13 американски војници во судирите со Иран.