Соединетите Американски Држави нема да дозволат ниту еден случај на ебола да влезе во земјата поради актуелната епидемија во Демократска Република Конго, изјави американскиот државен секретар Марко Рубио.
„Не можеме и нема да дозволиме ниту еден случај на ебола да влезе во САД“, изјави Рубио за време на состанок на кабинетот на американскиот претседател Доналд Трамп.
Според податоците, во Демократска Република Конго досега се регистрирани околу 900 заразени лица, а постои сомнеж за 220 смртни случаи поврзани со епидемијата.
Рубио посочи дека американските институции, меѓу кои Стејт департментот, Центарот за контрола и превенција на болести (CDC) и Министерството за здравство, работат на сузбивање на кризата на терен.
Тој нагласи дека Вашингтон ја зголемил помошта за погодените земји, пред сè за Конго, со цел епидемијата да биде ставена под контрола уште на изворот.
Како мерка на претпазливост, американскиот CDC минатата недела воведе 30-дневни ограничувања за влез на патници кои во последните 21 ден престојувале во Демократска Република Конго, Уганда или Јужен Судан.
Мерките се однесуваат и на лицата со постојан престој во САД, а патниците од овие земји ќе поминуваат дополнителни проверки на три американски аеродроми.
