Русија ги погодува американските компании во Украина, а администрацијата на Трамп не реагира

Додека администрацијата на американскиот претседател Доналд Трамп врши притисок врз Украина да ги запре нападите врз руските нафтени рафинерии, повикувајќи се на последиците врз американските потрошувачи, руските напади врз компании од САД што работат во Украина не наидуваат на споредлива јавна реакција од Вашингтон.

Според Си-ен-ен, Русија во изминатите месеци ги засилила нападите врз објекти поврзани со американски компании, меѓу кои се „Кока-кола“, „ПепсиКо“, „Мекдоналдс“ и производителот на бисквити „Орео“, како и врз цивилната инфраструктура во Украина.

Енди Хандер, претседател на Американската стопанска комора во Украина, за Си-ен-ен изјавил дека руски ракети и беспилотни летала оштетиле производствени капацитети и објекти на некои од најпознатите американски брендови. Според него, такви напади имало и претходно, но нивното засилување во последните месеци е особено загрижувачко.

— реклама —

„Ова се директни погодоци со беспилотни летала и ракети, а нападите не престануваат. Со тоа испраќаат порака дека американските компании се нивна цел. Не гледаме никаква реакција од Белата куќа“, изјавил Хандер, додавајќи дека се загрозени американските интереси, капиталот и инвеститорите.

На почетокот на септември, руски дрон погодил фабрика на „Кока-кола“ во близина на Киев. Украинскиот претседател Володимир Зеленски тогаш оцени дека нападот претставува јасна порака до САД, нагласувајќи дека Русија знае дека станува збор за американска компанија.

Подоцна истиот месец, според Зеленски, руски напад со беспилотно летало уништил складиште што го користи „Мекдоналдс“. Од компанијата потврдиле дека на 25 септември било оштетено складиште на нивен логистички партнер во Киевската област. Поради последиците од нападот, рестораните во Украина биле принудени да понудат ограничено мени.

— реклама —

И „ПепсиКо“ кон крајот на август соопштила дека нејзиниот производствен капацитет во Миколаевската област бил оштетен. Според компанијата, во нападот немало жртви.

Американските компании немаат единствен став за тоа колку јавно треба да зборуваат за нападите. Поранешен висок функционер на американскиот Стејт департмент изјавил за Си-ен-ен дека некои фирми се воздржуваат од јавно откривање дека повеќепати биле цел на напади. Хандер потврдил дека дел од компаниите сакаат случаите да бидат објавени, додека други пристапуваат многу повнимателно.

Неколку демократи во американскиот Конгрес јавно ја повикале Белата куќа да преземе повеќе мерки за заштита на американските компании во Украина и да ги осуди руските напади. Американската стопанска комора, пак, разговарала со конгресмени од двете партии при нивните посети на Киев, барајќи прашањето да биде покренато пред администрацијата.

— реклама —

Недостигот од јавно осудување на руските напади е во спротивност со предупредувањата што администрацијата на Трамп ѝ ги упатува на Украина поради нападите врз руската енергетска инфраструктура. Си-ен-ен во февруари објави дека Вашингтон го предупредил Киев оти нападите врз руски нафтен објект во Црното Море влијаеле врз американските инвестиции во Казахстан.

Во последните недели, Трамп ги поврзува растечките цени на горивата со украинските напади врз руските капацитети за производство на дизел, иако цените пораснале и како последица на војната меѓу САД и Иран. Минатиот петок тој најавил договор за укинување на санкциите и купување дизел од Русија, за што во текстот се наведува дека би било спротивно на американскиот закон.

Според извори на Си-ен-ен, САД ѝ се заканиле на Украина дека би можеле да ја ограничат размената на разузнавачки информации и испораката на муниција доколку Киев не ги запре нападите. Трамп во август 2025 година, прашан за руски напад врз американска фабрика за електроника, изјавил дека му кажал на рускиот претседател Владимир Путин оти не е задоволен од тоа.

Од Белата куќа за Си-ен-ен изјавиле дека Трамп сака војната целосно да заврши и дека тој и неговиот тим остануваат посветени на постигнување мировен договор.

Хандер, сепак, вели дека тешко ја разбира воздржаноста на американската администрација, особено затоа што таа се претставува како поддржувач на американското претприемништво. Тој истакнал дека компаниите очекуваат сопствената влада да ги брани нивните интереси кога странска војска ги напаѓа.

Американската стопанска комора минатиот месец побарала средба со специјалниот пратеник Стив Виткоф и Џаред Кушнер за да ги информира за состојбата на американските бизниси во Украина и за најновите напади. Според Хандер, на барањето не добиле одговор.