Русија го засилува извозот на гас кон Кина: Надминат дневниот рекорд

Рускиот енергетски гигант „Газпром“ објави дека го соборил рекордот на дневни испораки на природен гас за Кина преку гасоводот „Моќта на Сибир“.

— реклама —

Новиот максимум бил постигнат на 1 ноември, продолжувајќи го низот рекордни испораки во текот на октомври, кога „Газпром“ дури пет пати ги надминал дневните рекорди во рамките на еден месец.

Испораките се реализираат врз основа на долгорочниот договор за купопродажба на природен гас меѓу „Газпром“ и кинеската компанија CNPC, пренесува Интерфакс.

— реклама —

Рускиот вицепремиер Александар Новак во средината на октомври изјави дека се очекува испораките на гас за Кина преку гасоводот „Моќта на Сибир“ во текот на 2026 година да достигнат 39 милијарди кубни метри. Тоа е повеќе од основниот договорен капацитет од 38 милијарди кубни метри годишно, објави РИА Новости.

— реклама —

Во 2025 година, „Газпром“ преку овој гасовод испорачал 38,84 милијарди кубни метри гас за Кина, со што исто така го надминал планираното ниво.

Откако гасоводот „Моќта на Сибир“ го достигнал планираниот годишен капацитет од 38 милијарди кубни метри, „Газпром“ започнал со активности за зголемување на транспортните можности преку изградба на дополнителни паралелни цевководи. Истовремено, се прошируваат и производствените капацитети за гас во Јакутија и Иркутската област.

— реклама —

Пред една година, „Газпром“ и кинеската CNPC постигнале договор за постепено зголемување на годишните испораки преку „Моќта на Сибир“ на 44 милијарди кубни метри.