Русија планира рекордни 202 милијарди долари за одбрана во 2027 година

Русија планира во 2027 година да издвои 17,1 трилиони рубљи, односно околу 202,58 милијарди долари, за одбрана. Според владините документи до кои дошол „Ројтерс“, станува збор за највисок износ од почетокот на војната во Украина и за околу 27 отсто повеќе од првично планираните 13,5 трилиони рубљи.

Документите покажуваат дека Москва не планира намалување на воената потрошувачка, иако се соочува со зголемен буџетски дефицит и пад на приходите од нафта и гас.

— реклама —

Планираните издвојувања укажуваат на тоа дека руската власт смета на долгорочно високи воени трошоци, наместо на брзо намалување на расходите поврзани со војната. За нивно финансирање се предвидува зголемување на даноците, дополнително задолжување и користење на средства од националните резерви.

Вкупните издвојувања за одбрана во следните три години треба да достигнат 50 трилиони рубљи. За 2026 година првично бил планиран износ од 12,1 трилиони рубљи, но реалната воена потрошувачка останува тајна и нема да биде објавена. Во документите се наведува и дека дел од воените расходи може да бидат распределени во други буџетски ставки.

— реклама —

Во исто време, руската влада ја удвои проценката за буџетскиот дефицит во 2026 година, од 1,6 на 3,2 отсто од бруто-домашниот производ. Вкупната буџетска потрошувачка во 2026 година треба да порасне за 13,2 отсто, на 48,6 трилиони рубљи, што претставува 20,9 отсто од БДП.

За покривање на зголемениот дефицит, владата најави и нови даночни мерки за 2027 година. Според документите, новиот данок на екстрапрофитот на металуршките и рударските компании би требало да носи околу 200 милијарди рубљи годишно.

— реклама —

Планот за нето-задолжување во 2026 година ќе биде зголемен за 26 отсто, на пет трилиони рубљи. За намалување на дефицитот ќе се користат и 459 милијарди рубљи од Фондот на националното богатство, што претставува околу 11 отсто од ликвидниот дел на фондот.

Истовремено, проценката за приходите од нафта и гас за 2026 година е намалена од 8,9 на 7,6 трилиони рубљи.

Според проекциите, државниот долг во 2027 година ќе достигне 21,7 отсто од БДП, во споредба со 19,9 отсто во 2026 година. Тоа ќе биде над нивото од 20 отсто кое руските власти го сметаат за безбедно.

Вкупното задолжување во 2027 година, пак, се очекува да порасне за 43 отсто, достигнувајќи 7,7 трилиони рубљи.