Русија подготвена да испорача милиони тони дизел за САД

Русија ќе почне пред предвидениот рок да ги укинува ограничувањата за извоз на дизел, а испораките на среден рок би можеле да достигнат до три милиони тони месечно, изјави рускиот вицепремиер Александар Новак, пренесе агенцијата „Интерфакс“.

Новак рече дека Москва позитивно ги оценува чекорите на САД за стабилизирање на светскиот енергетски пазар и постепено обновување на нормалната трговија со енергенси. Тој додаде дека Русија е подготвена за понатамошна координација со цел да се создаде попредвидлив и постабилен пазар.

— реклама —

Според најавата на рускиот вицепремиер, Русија е подготвена уште во октомври да испорача 300.000 тони дизел на американскиот пазар и на други партнери. Количеството би можело да се зголеми на 500.000 тони во ноември и на еден милион тони во декември. Новак рече дека и рускиот домашен пазар ќе биде целосно снабден со дизел.

— реклама —

Претходно, Канцеларијата за контрола на странски средства при американското Министерство за финансии, по налог на претседателот Доналд Трамп, издала привремена општа лиценца со која се дозволува снабдување на светскиот пазар со руски дизел.

Трамп и рускиот претседател Владимир Путин постигнале договор за испорака на неколку милиони тони руски дизел на американскиот и светскиот пазар. Американскиот претседател оцени дека договорот ќе доведе до брзо и значително намалување на цените на горивото.

— реклама —

На социјалната мрежа „Трут соушл“, Трамп објави дека Русија веднаш ќе испорача повеќе од 300.000 тони дизел, дополнителни 500.000 тони во ноември и уште еден милион тони во наредниот период.

Украинскиот претседател Володимир Зеленски го осуди договорот, оценувајќи дека отстапките кон Путин нема да донесат мир ниту корист за цивилизираниот свет, туку дека Русија ќе возврати со нов терор и насилство.

Според Зеленски, дозволувањето на Русија да продава нафтени деривати претставува инвестиција во војната, која треба да биде завршена, а не продолжена.