Руски воени извори и провоени блогери сè почесто објавуваат снимки за кои постои сомнеж дека се создадени или изменети со помош на вештачка интелигенција, со цел да прикажат руски војници во украински населени места кои, според проценките, всушност не биле освоени, објави американскиот Институт за проучување на војната (ISW).
ISW од почетокот на јуни до крајот на август идентификувал најмалку 35 снимки за кои се сомнева дека биле изменети со вештачка интелигенција. Комерцијални алатки за откривање содржина создадена со АИ со голема сигурност најмалку 10 од нив ги означиле како манипулирани. Институтот предупредува дека вистинскиот број веројатно е поголем, бидејќи постојните алатки не ги откриваат сите видови измени.
На снимките најчесто се прикажани руски војници како поставуваат или развиоруваат руски знамиња во украински населени места. Таквиот материјал потоа се користи како наводен доказ дека руските сили го презеле подрачјето.
Според ISW, засега нема докази дека станува збор за единствена и централно координирана практика на целата руска војска. Сомнителните снимки ги објавуваат различни руски единици и воени блогери. Една од можностите, според институтот, е некои единици да ги користат за пред претпоставените да прикажат дека ги исполниле зададените цели или да ги прикријат неуспесите на бојното поле.
Манипулациите често содржат забележливи грешки – неприродни пропорции на телата, нелогични сенки и движења, како и луѓе или знамиња кои ненадејно исчезнуваат или ја менуваат формата. Со брзо движење на камерата, зумирање и сечење на снимките, овие недостатоци потешко се забележуваат.
Како пример, ISW ја издвојува снимката објавена на 27 јули, за која руски воен блогер тврдеше дека прикажува руски војник со знаме во Било Колодјаз во Харковската област, по наводното „ослободување“ на местото. На снимката, според институтот, војникот има неприродни пропорции, а при оддалечувањето на камерата тој ненадејно исчезнува од грмушките.
Сличен случај бил забележан и на 20 август, кога била објавена снимка со која требало да се докаже преземањето на Миколајпилја во Доњецката област. На неа руското знаме се појавува од покривот на куќа, а потоа повторно „се влева“ во него.
Особено впечатлив е случајот со Свјатохирск. Рускиот претседател Владимир Путин на 1 септември тврдеше дека руските сили го зазеле градот, по што руски извори објавувале снимки како наводен доказ за контролата врз него.
Сепак, на 7 септември командантот на украинскиот Трет армиски корпус, бригадниот генерал Андриј Билецки, објавил видеопорака од центарот на Свјатохирск. ISW врз основа на снимката заклучил дека градот и натаму е под украинска контрола.
Институтот предупредува дека ваквите лажни информации можат да создадат проблеми и за самата руска војска. Доколку командантите поверуваат дека руските сили контролираат место што всушност е под украинска контрола, идните операции би можеле да бидат планирани врз основа на погрешна слика за состојбата на бојното поле.
ISW оценува дека употребата на снимки создадени или изменети со вештачка интелигенција може дополнително да се зголемува бидејќи алатките за создавање уверливи видеа стануваат сè подостапни. Институтот предупредува дека следен чекор би можело да биде и создавање лажни сателитски снимки и други визуелни „докази“ за состојбата на бојното поле.
