Руски дизел тргна кон Њујорк: Танкер со 40.000 тони гориво отплови по договор меѓу Путин и Трамп

Танкер што плови под знамето на Малта, натоварен со 40.000 тони руски дизел, се упатил кон Њујорк по договор меѓу рускиот претседател Владимир Путин и американскиот претседател Доналд Трамп, покажуваат податоците на британската аналитичка компанија LSEG.

— реклама —

Танкерот „Агиои Фанедес“ го натоварил дизелот на 22 октомври во руското балтичко пристаниште Приморск, а според најавената маршрута, во Соединетите Американски Држави треба да пристигне на 7 ноември.

Рускиот вицепремиер Александар Новак пред два дена ја најавил испораката, посочувајќи дека станува збор за прва пратка од планираната серија испораки на руски нафтени деривати за американскиот пазар.

— реклама —

Прашањето за испораките на нафта и нафтени производи било отворено и за време на телефонскиот разговор меѓу Путин и Трамп на 9 октомври. Тогаш рускиот претседател изјавил дека Москва е подготвена да снабдува со нафта и нафтени деривати и американскиот и светскиот пазар.

— реклама —

Новак претходно соопштил дека Русија предвреме ги укинува ограничувањата за извоз на дизел, со што се отвора можност за значително зголемување на испораките во наредните месеци.

Според најавените количини, Русија би можела да извезе 300.000 тони дизел во октомври, 500.000 тони во ноември и еден милион тони во декември. На подолг рок, според проценките на Новак, месечните испораки би можеле да достигнат и три милиони тони.

Најавената испорака кон Њујорк доаѓа во контекст на разговорите меѓу Москва и Вашингтон за енергетската соработка, додека останува да се види дали планираните количини ќе бидат реализирани.