Руските сили утрово двапати погодиле центар за податоци во Киев, при што биле повредени тројца луѓе, меѓу кои и две деца. Во одвоен напад со дрон во областа Соломјански загинал еден маж, а биле предизвикани и пожари во два нестамбени објекти, објави „Украинска правда“.
Нападите се дел од серијата интензивни руски воздушни удари врз Украина во изминатиот период. Според украинскиот претседател Володимир Зеленски, само во текот на последната недела Русија употребила повеќе од 2.200 дронови, околу 1.650 воздушни бомби и 38 ракети од различен тип. Тој посочи дека значителен дел од ракетите биле балистички.
Во текот на ноќта меѓу 26 и 27 септември биле погодени станбени објекти, енергетски постројки и друга цивилна инфраструктура во областите Одеса, Харков, Суми, Миколаив, Херсон, Полтава, Житомир и Киев.
Во нападите во Запорошката област загинале три лица.
Зеленски упати повик до Кина, Индија, Бразил, Јужноафриканската Република и останатите членки на Г20, како и до земјите од Глобалниот југ, да го искористат своето влијание врз Русија и да помогнат во напорите за завршување на војната.
