Романија открила мрежа за саботажи за која тврди дека ја координира Русија

Романските разузнавачки служби откриле мрежа осомничена за подготовка на саботажи, за која тврдат дека била координирана од руските тајни служби. Според медиумите во Букурешт, уапсени се двајца осомничени во Германија, додека трет е пронајден во Полска.

— реклама —

Меѓу планираните акции бил и обидот за подметнување пожар во фабриката за оружје „Карфил“ во Брашов, во средината на минатиот месец. Романската Дирекција за истраги на организираниот криминал и тероризмот води истрага против тројца осомничени – еден Украинец и двајца Белоруси. Романските власти побарале нивна екстрадиција, објави „Диги 24“.

— реклама —

— реклама —

Според досегашните сознанија, активностите на групата не биле ограничени само на Романија. Истрагите спроведени годинава откриле и други обиди за напади врз цели на романска територија, меѓу кои меѓународни воени објекти и локации користени за обука на украинските вооружени сили.

Според романските медиуми, целта на овие дејства била заплашување, нанесување штета на одбранбените способности и ослабување на придонесот на засегнатите држави во европската и регионалната безбедност. Наводната поврзаност со руските служби е предмет на истрагата.