Генералниот секретар на НАТО, Марк Руте, ги отфрли тврдењата дека Соединетите Американски Држави се оддалечуваат од своите сојузници, нагласувајќи дека Вашингтон останува цврсто посветен на Алијансата.
На прес-конференција во пресрет на состанокот на министрите за одбрана на земјите-членки на НАТО, Руте изјави дека Алијансата историски била премногу зависна од американската поддршка, но дека денес е потребна поправедна распределба на одговорностите меѓу сојузниците.
„Не е точно дека САД се оддалечуваат од своите сојузници. Вашингтон јасно стави до знаење дека останува посветен на НАТО“, изјави Руте.
Тој посочи дека САД ги приспособуваат своите придонеси во рамките на НАТО, додека европските сојузници и Канада постепено преземаат поголем дел од безбедносниот товар, што, според него, ја прави Алијансата посилна.
„На НАТО му се потребни повеќе сила, повеќе ресурси и многу посилна индустриска база. Сега другите сојузници вложуваат повеќе и тоа е фер пристап“, нагласи генералниот секретар.
Осврнувајќи се на актуелната безбедносна состојба, Руте оцени дека НАТО се соочува со динамично и предизвикувачко безбедносно окружување, што бара зголемени инвестиции во одбраната.
Тој додаде дека Франција и Велика Британија се подготвени да ги поддржат активностите во Ормутскиот Теснец по постигнувањето на меморандумот за разбирање меѓу САД и Иран за прекин на конфликтот.
Руте истакна дека од земјите-членки се очекува да достават конкретни и веродостојни планови за исполнување на целта за издвојување пет проценти од бруто-домашниот производ за одбрана до 2035 година.
„Очекувам сојузниците да презентираат јасни и конкретни планови за постигнување на оваа цел, по можност многу пред договорениот рок“, порача Руте.
Според него, зајакнувањето на одбранбените капацитети и поголемите вложувања остануваат клучни за идната безбедност и стабилност на Алијансата.
