Руте: Русија месечно губи над 40.000 војници во војната во Украина

Русија месечно губи повеќе од 40.000 војници во војната во Украина, вклучително загинати и тешко ранети, изјави генералниот секретар на НАТО, Марк Руте. Според него, во октомври бројката би можела да надмине и 50.000, што би претставувало огромни човечки загуби за руската армија.

— реклама —

Руте ова го изјави на форумот „Атлантик фјучр“, споредувајќи ги руските загуби со американските во Виетнам. Тој посочи дека САД за 14 години војување во Виетнам загубиле 56.000 луѓе, додека Русија бележи повеќе од 40.000 загинати и тешко ранети за само еден месец.

Според генералниот секретар на НАТО, рускиот претседател Владимир Путин не успева да ги оствари воените цели во Украина, поради што Русија ги засилува нападите врз цивилното население и критичната инфраструктура, обидувајќи се да ја ослаби украинската волја за отпор пред зимата.

— реклама —

Руте обвини и дека Москва ја интензивирала кампањата на непријателски активности низ Европа, вклучувајќи подметнување пожари, инциденти со беспилотни летала и кибернапади, со цел да ги дестабилизира европските општества и да ја намали поддршката за Украина.

— реклама —

Тој порача дека НАТО одговара на руските хибридни активности со зголемување на помошта за Украина.

Претходно, Алијансата процени дека Русија во септември имала повеќе од 50.000 воени загуби, од кои околу 28.000 загинати. Според процената објавена во текот на летото, од почетокот на руската инвазија Русија изгубила повеќе од 1,4 милиони војници, наведува НАТО.

— реклама —