Арина Сабаленка продолжува со одличните настапи на УС Опен, откако во осминафиналето ја совлада Американката Тејлор Таунсенд со 6:4, 6:3 и обезбеди пласман во четвртфиналето.
На Сабаленка ѝ беа потребни само еден час и 15 минути за победата, со која стигна до 17. последователен триумф во Њујорк. Двократната последователна шампионка на турнирот со тоа го избори и своето 17. гренд-слем четвртфинале во кариерата, а шести пат меѓу најдобрите осум стигнува токму на УС Опен.
Таунсенд, која моментално е 96. на ВТА-листата, во вториот сет поведе со 3:1 и се закани дека ќе го направи мечот неизвесен. Сепак, Сабаленка одговори со серија од пет освоени гема и го заврши мечот без трет сет.
Сабаленка на овогодишниот УС Опен ги брани и првото место на ВТА-листата. За да остане на врвот, потребно е третпат по ред да го освои турнирот, под услов Елена Рибакина да не стигне до полуфиналето.
Во четвртфиналето Сабаленка ќе игра против победничката од дуелот меѓу шестата носителка Линда Носкова и 11. носителка Марта Костјук.
